SAAYA E KHAYRUL WARA MILTA NAHI LYRICS

SAAYA E KHAYRUL WARA MILTA NAHI LYRICS

Do Jahaañ Me Ko-ee Tum Sa Dusra Milta Nahiñ
Dhoondte Phirte Haiñ Mehr o Maah Pata Milta Nahiñ

He Rag e Gardan Se Aqrab, Nafs Ke Andar He Wo
Yuñ Galay Se Mil Ke Bhi, Wo Juda Milta Nahiñ

Aab e Bahr e Ishq Jaanaañ, Seene Me He Mawjzan
Kaun Kehta He Hameñ, Aab e Baqaa Milta Nahiñ

Aab e Taigh e Ishq Pee Kar, Zinda e Jaawed Ho
Gham Na Kar Jo Chashma e Aab o Baqaa Milta Nahiñ

Doob Tu Bahr e Fana Me Phir Baqaa Paa-ega Tu
Qabl Az Bahr e Fana, Bahr e Baqaa Milta Nahiñ

Duniya He Awr Apna Matlab, Be Gharaz Matlab Ko-ee
Aashna Milta Nahiñ, Na-Aashna Milta Nahiñ

Zar’rah-Zar’rah Khaak Ka Chamka He Jis Ke Noor Se
Be Baseerat He Jisay Wo Mah Liqa Milta Nahiñ

Zar’rah-Zar’rah Se ‘Ayaañ He, Aisa Zaahir Ho Ke Bhi
Qatre-Qatre Me Nihaañ He, Barmala Milta Nahiñ

Jo Khuda Deta He Milta He Isee Sarkaar Se
Kuch Kisi Ko Haq Se Us Dar Ke Siwa Milta Nahiñ

Kya ‘Ilaaqa Dushman e Mahboob Ko Allah Se
Be Raza e Mustafa Har Giz Khuda Milta Nahiñ

Ko-ee Maange Ya Na Maange Milne Ka Dar He Yahi
Be ‘Ataa e Mustafa-i Mud-da’a Milta Nahiñ

Rahnumao-ñ Ki See Soorat Raah-maari Kaam He
Rahzan Haiñ Koo Ba-koo Awr Rahnuma Milta Nahiñ

Ahle Gahle Haiñ Masha’ikh Aajkal Har-Har Gali
Be Hama Wa Ba Hama Mard e Khuda Milta Nahiñ

Haiñ Safa e Zaahiri Ke Saaz o Saamaañ Khoob-Khoob
Jis Ka Baatin Saaf Ho, Wo Ba Safa Milta Nahiñ

Bar Zabaan Tasbeeh Wa Dar e Dil Gaaw Khar Ka Dawr Ho
Aise Milte Haiñ Buhat Is Se Wara Milta Nahiñ

Bas Yahi Sarkaar He Is Se Hamesha Paa-enge
Dene Waale Dete Haiñ Kuch Din Sadaa Milta Nahiñ

Door Saahil Mawj Haa-il Paara Beyr’a Kijiye
Naa-oñ He Manjdhaar Me Awr Na Khuda Milta Nahiñ

Wasl e Maula Chahate Ho To Wasila Dhoond Lo
Be Wasila Najdiyo! Har Giz Khuda Milta Nahiñ

Daaman e Mahboob Chor’ay Maange Khud Allah Se
Aise Mardak Ko Khuda Se Mud-da’a Milta Nahiñ

Zar’rah, Zar’rah, Qatrah, Qatrah, Se ‘Ayaañ Phir Bhi Nihaañ
Ho Ke Sha e Rag Se Qareeñ Tar, He Juda, Milta Nahiñ

Taa-ir e Jaañ Ki Tarah Dil Ur’h Ke Jaa Baytha Kahaañ
Mere Pehlu Me Abhi Tha Kya Huwa Milta Nahiñ

Dahriya Uljha Huwa He Dahr Ke Phandoñ Me Yuñ
Saara Uljha Saamne He Awr Sira Milta Nahiñ

Ilm Saane’ Hota He, Masnu’ Se Lekin Isay
Dekh Kar Masnu’ Saane’ Ka Pata Milta Nahiñ

Ne’mat e Kaunain Dete Haiñ Do Aalam Ko Yahi
Maang Dekho Un Se, Tum Dekho To Kya Milta Nahiñ

Sub Se Phir Kar Aa-e Haiñ Ab Shaah e Waala Ke Huzoor
Juz Tumhare Shaafa e Roz e Jaza Milta Nahiñ

Dard Mandi Ke Liye Aadam Se Taa Esa Gaye
De Jo Apne Dard Ki Hakmi Dawa Milta Nahiñ

Jin Se Umeed Karam Thee De Diya Sub Ne Jawaab
Aaj Ke Kaam Aane Waala Khusrawa Milta Nahiñ

Yaas Ka Aalam He Sub Se Aas To’ray Aa-e Haiñ
Zaat E Waala Ke Siwa, Awr Aasra Milta Nahiñ

Jal Rahe Haiñ Phunk Rahe Haiñ Aashiqaan e Sokhta
Dhoop He Awr Saaya e Zulf e Rasa Milta Nahiñ

Wo He Khursheed e Risaalat Noor Ka Saaya Kahaañ
Is Sabab Se Saaya e Khayrul Wara Milta Nahiñ

Dushman e Jaañ Se Kaheeñ Bud-tar He Dushman Deen Ka
Un Ke Dushman Se Kabhi Un Ka Gada Milta Nahiñ

Qaasim e Ne’mat Se Hum Maangeñ To Najdi Yuñ Bakeñ
Kyuñ Nabi Se Maangiye, Allah Se Kya Milta Nahiñ

Mustafa Ma Ji’ta Il’la Rahmatulil Aalameen
Chaarah Saaz Dusra Tere Siwa Milta Nahiñ

Khud Khuda Be Waasta De, Ye Humaara Munh Kahaañ
Waasta Sarkaar Haiñ Be Waasta Milta Nahiñ

Hum To Hum, Wo Ambia Ke Bhi Liye He Waasta
Unko Bhi Jo Milta He, Be Waasta Milta Nahiñ

Ambia, Ba’az Awliyah Faa-iz He Is Sarkaar Se
Har Wali Ko Raasta, Be Waasta Milta Nahiñ

Donoñ Aalam Paate Haiñ Sadqa Isee Sarkaar Ka
Khud Khuda Se Paa-e Jo Un Ke Siwa Milta Nahiñ

Zan, Zameen o Zor, Awr Zar Ke Haiñ Gaahak Har Kaheeñ
Dil Se Jo Ho Taalib e Zikr e Khuda Milta Nahiñ

Chaar Zaa, Ek Zaal Ke Badle Me Leñ Chawkas Rahe
Ye Na Samjhe Ye Ikaa-ee Sekr’a Milta Nahiñ

Daad e Dunya Kaisa, Uff Sunte Nahiñ Faryaad Bhi
Sun’ne Waala Dard Ka Ko-ee Shaha Milta Nahiñ

Baap, Maañ, Bha’ee, Bahan, Farzand o Zan, Ik Ik Juda
Ghamzada Har Ek He, Awr Ghamzuda Milta Nahiñ

Jo Muhib Ki Cheez He, Mahboob Ke Qabze Me He
Haath Me Ho Jis Ke Sab Kuch, Us Se Kya Milta Nahiñ

Dil Sataani Karne Waale Haiñ Hazaaroñ Dil-ruba
Dil Nawaazi Karne Waala Dil-Ruba Milta Nahiñ

Dil Gaya Ach’cha Huwa, Iska Nahiñ Gham; Gham He Ye,
Le Gaya Pehlu Se Jo, Wo Dil-Ruba Milta Nahiñ

Muhy e Sunnat, Haami e Mil’lat, Mujad’did Deen Ka
Paykar e Rushd o Huda Ahmad Raza Milta Nahiñ

Be Nawa Ko Be Sada Milta He Is Sarkaar Se
Doodh Bhi Betay Ko Maañ Se Be Sada Milta Nahiñ

Kis Tarah Ho Haazir e Dar Noori e Be Par Shaha
Naakay Rokay Dushmano Ne Raasta Milta Nahiñ