jis vaqt hujūm-e-mastī ho insāñ kā sambhalnā mushkil hai
uTh jaa.e jab un kī mast nazar phir hosh meñ rahnā mushkil hai
phūlūñ meñ yahāñ tāroñ meñ vahāñ ab husn tumhārā ‘aam huā
tum laakh chhupe parde meñ magar jalvoñ kā chhupānā mushkil hai
maiñ shauq-e-ibādat le ke sanam uTThūñgā na terī chaukhaT se
hotā hai jo tere dar pe adā masjid meñ vo sajda mushkil hai
duniyā se alag ‘uqbā se judā rahtā hai sadā rastā un kā
kis dhun meñ haiñ un ke dīvāne ye raaz samajhnā mushkil hai
ai husn-e-sanam ke shaidā.ī qismat meñ rahegī mahrūmī
jab tak na junūñ ho rāh-numā manzil pe pahuñchnā mushkil hai
chehre se haTā kar parde ko bas jaao mire dil meñ aa kar
nazroñ ke sahāre ai jānāñ dīdār tumhārā mushkil hai
gumrāh huī hai ‘aql ‘fanā’ le aayā kahāñ ye shauq-e-talab
kal un kā samajhnā mushkil thā aaj apnā samajhnā mushkil hai