Naat Sharif

نعت رسول مقبول ﷺ
اپنے پیروں پر رکھے خود ہی اپنا سر ہوتا
” خلد زارِ طیبہ کا اس طرح سفر ہوتا ”
دل پہ میرے گر تیری پہرئہ نظر ہوتا
نا کسی کا ڈر ہوتا نا کوئی خطر ہوتا
مِثْلُکُمْ نہ فرماتا رب کعبہ قرآں میں
وہ حسین رخ والا محض جو بشر ہوتا
دو جہاں کا ان کو رب نے بنا دیا مالک
دشمنِ محمد تو کیوں نہ دربدر ہوتا
آتا میں پرندوں سنگ مصطفیٰ کی چوکھٹ پر
گر نصیب احسن مجھ کو بھی بال و پر ہوتا
وسیم احسن
ٹھاکرگنج بہار

حـرفِ مــدعــــا اے کاش اتنا پُـر اثـر ؛ ہوتا
ان کے آســتـانے کے پاس میــرا گھـر ؛ ہوتا
لب پـہ نعـت ہـوتی مِـن اَدلِـــہ اِلـیٰ آخـــــر
“خُـلـد زار طـیبـہ کا اِس طــرح ســفـر ؛ ہوتا”
جــــــالیِ مُبــارک کو چومتا بچـشـم و لب
اور خـمیـدہ سَــر میرا پیش سنگ در ؛ ہوتا
رشک میری آنکھوں پَر کرتیں پھر ہزار آنکھیں
خواب میں تِـرا چـہـرہ ســـامنے اگـر ؛ ہوتا
ان کی چـشـم رحمت سے ہوتی رہبـری میری
بَـرق کی طرح پُل سے میرا بھی گزر ؛ ہوتا
جس کے منہ سے نکلی ہر بات وحی رب نکلی
کیوں نـہ مُـصـطـفیٰ کا ہر قَـول مُعـتبـر ؛ ہوتا
ان کے روضــۂ اقـدس کے قـریب اے راحتؔ!
مـوت ، مُـنتَظِـر ہوتی اور میں مُـنتَظَـر ؛ ہوتا
________از راحتؔ انجـم (مـمبئی)________
۔۔۔۔۔۔۔۔۔۔۔۔۔۔۔۔۔۔۔۔9892020938۔۔۔۔۔۔۔۔۔۔۔۔۔۔۔۔۔۔۔۔

کاش ان کی گلیوں میں میرا ایک گھر ہوتا
یوں فضائے طیبہ میں میرا بھی گزر ہوتا
روح میری نکلے جب دل کی ایک حسرت ہے
مصطفے کی چوکھٹ پر کاش اپنا سر ہوتا
جان و دل فدا کرتا چلتا اپنی پلکوں سے
خلد زار طیبہ کا اس طرح سفر ہوتا
پل میں منہدم ہوتے ظلم کے سبھی قلعے
گر زمانے کا حاکم پر تو عمر ؛؛؛؛؛؛؛؛؛؛ہوتا
یوں ہی گھومتا پھرتا مصطفے کی گلیوں میں
زندگی کا ہر لمحہ میرا ؛؛؛؛؛؛؛؛؛؛؛؛؛پر اثر ہوتا
رہنے کا شرف ملتا گر مجھے مدینے میں
گرد بن کے اے انور خاک ؛؛؛؛ رہ گزر ہوتا
غلام انورجامعی قادری
سعداللہ نگر بلرامپور

مصطفیٰ کے کو چے میں کاش میرا گھر ہوتا
رحمت الٰہی سے میں قریب تر ہوتا
میرے سر کی قسمت میں ان کا سنگ در ہوتا
پاٶں آسماں چھوتے سر زمین پر ہوتا
ساتھ میں درودوں کا ورد بھی اگر ہوتا
آہ کار گر ہوتی ، نالہ پر اثر ہوتا
پھر تو انکی رحمت سے دل کی آنکھ کھل جاتی
بے ہنر یہ دل میرا صاحب ہنر ہو تا
دیر رات تک ان کے در پہ حاضری ہوتی
صبح ان کا روضہ ہی مطمح نظر ہوتا
ایک شعر بھی آقا گر قبول کر لیتے
تب کہا، لکھا میرا کتنا معتبر ہوتا
اور اک کرم آقا اس کفیل پر کرتے
حاضری کا یہ وقفہ قدرے مختصر ہوتا
کفیل فتحپوری
مدرسہ شمس العلوم سنگاٶں
فتحپور یو۔۔پی

عاشقوں کی نظروں میں کتنا معتبر ہوتا
مصطفی کے کوچے کا میں اگر شجر ہوتا
دم مرا نکلتا جب یا خدا یہ خواہش ہے
مصطفی کی چوکھٹ پہ کاش میراسر ہوتا
آفتیں نہیں آتیں تیرے گھر کبھی کوئی
مصطفی کی آمد کا تذکرہ اگر ہوتا
پیدا ہو کے مر جاتا دور میں جو آقا کے
زندگی کا ہر لمحہ کتنا خوب تر ہوتا
آپ کے مدینے میں اڑ کے میں چلا آتا
یا نبی اگر میرے پاس بال و پر ہوتا
موت مجھ کو آ جاتی کاش گر مدینے میں
ان کے آستانے سے آخری سفر ہوتا
گر کرم ذرا کرتے اس پہ اے مرے آقا
یہ اویس رضوی بھی آپ کے نگر ہوتا
محمد اویس رضا حشمتی
دھنکھرپوری

گر نبی نہیں آتے ظلمتوں کا گھرہوتا
شمس بھی نہیں ہوتا اور نا قمرہوتا
موت منتظر ہوکر میرےساتھ ہی رہتی
خلد زار طیبہ کا اس طرح سفر ہوتا
رشک میری قسمت پرکرتاعرش اعظم بھی
مصطفےکی گلیوں کا میں اگر حجر ہوتا
مصطفےکےصدقےمیں قبروحشرروشن ہے
وہ کرم نہیں کرتے حال پھر دگر ہوتا
جب نظرنہیں آتامصطفےکاسایہ بھی
ان کےمثل دنیامیں کیسےپھربشرہوتا
ان کے یادوں کی زلفیں ہوتیں سینۂ دل پر
اشک موتی بن جاتے لطف اس قدر ہوتا
مجھکوگرکہیں محفوظ اپنا مالک کوثر
تشنگی کی شدت سےحشرمیں نڈر ہوتا
محفوظ عالم جامعی بلرامپوری

خوف حشر کیوں ہوتا کیوں غم سقر ہوتا
میرا دل اگر میرے مصطفٰی کا گھر ہوتا
آنکھ میری نم ہوتی میں خمیدہ سر ہوتا
” خلد زار طیبہ کا اس طرح سفر ہوتا ”
میری بندگی کامل اس طرح تو ہو جاتی
مصطفٰی کا در ہوتا اور میرا سر ہوتا
جس کو نسبت کامل ان کے در سے ہو جاتی
پھر بھلا زمانے میں کیوں وہ در بدر ہوتا
رات دن جو رہتا ہے مست ان کی الفت میں
مصطفٰی کے عاشق کو کیسے حرص زر ہوتا
یہ ہمارا ایماں ہے پیش رب کوئی سجدہ
بے محبت شہ کے غیر معتبر ہوتا
گر ریاض عاصی کو وہ غلام کہ دیتے
پھر تو روز محشر یہ بندہ بے خطر ہوتا
محمد ریاض حسین خان قادری تیغی شمسی
دار العلوم تیغیہ شمس العلوم
رکسہا شریف، غازی پور ، یوپی

ان کا نقش پا ہوتا اور میرا سر ہوتا
پھر تو میں زمانے میں سب سے معتبر ہوتا
کاش ان کی گلیوں سے میرا بھی گزر ہوتا
خلد زار طیبہ کا اس طرح سفر ہوتا
سنّتِ صحابہ پر زندگی بسر کرکے
دھیرے دھیرے دنیا سے آخری سفر ہوتا
کاش ملتی ملنے کو خاک طیبہ چہرے پر
چاند بھی مرے آگے پھر تو بے اثر ہوتا
ہر گھڑی لگاتا میں شہر طیبہ کا چکّر
بازؤں میں گر میرے آڑنے والا پر ہوتا
مانگ لیتا طیبہ میں بود و باش آقا سے
گر زبان میں میری اتنا بھی اثر ہوتا
ہوتا اوج پر تارہ تیری خوش نصیبی کا
ان کے در کا اے غفران کاش تو حجر ہوتا
✍ محمد غفران قادری
سعداللہ نگر بلرام پور

آنکھیں تر بتر ہوتیں کیف میں جگر ہوتا
خلد زار طیبہ کا ا س طر ح سفر ہوتا
سامنے نگاہوں کے کا ش ان کا در ہوتا
ان کا سنگِ د ر ہو تا اور میرا سر ہوتا
دیکھتا ہر ا ک لمحہ آپ کا حسیں روضہ
مجھ سا کم نظر پھر تو صاحبِ نظر ہوتا
رونقِ در ِِ ا قد س قلب و ر و ح گرماتی
خودمیں رہ کےبھی اکثرخودسےبےخبر ہوتا
جا کے مر گیا ہوتا میں دیارِ رحمت میں
اور جان رحمت کی خا کِ رہ گز ر ہوتا
ا ڑ کے جو بکھر جا تا میری خاک کا ذرہ
عا شقا نِ سر و ر کا مطمحِ نظر ہوتا
ان کے پا ئے اقدس کا لمس پاتا گر اخترؔ
ڈوب کر بھی تو اب تک رونقِ سحر ہوتا
از : محمد اختر حسین حشمتی
دارالعلوم گلشنِ مدینہ ، پلٹن بازار
پرتاپ گڑھ ، یو – پی

جب مرا زمــــانے سے آخری سفر ہوتا
سامنے نگاہوں کے کاش ان کا در ہوتا
بن کے رحمتِ عــــــــــــالم وہ اگر نہیں آتے
میں گھرا مصیبت میں جانے کس قدر ہوتا
گردنیں قلم کــرتا منکرینِ احمد کی
ہاتھ میں اگر میرے خنجرِ عمر ہوتا
موت میری آجاتی گر تمہاری چوکھٹ پر
رحمتِ دوعـــالم میں مرکے بھی امر ہوتا
دیکھتا رُخِ انور روز اپنی آنکھوں سے
آپ کے زمـــــــانے میں یا نبی اگر ہوتا
چاند ہی کی کیا تخصیص چلتے شوق سے افلاک
آپ کا اشـــــــــــــــــــــــــــارہ گر سیّدُالبشر ہوتا
ہاتھ گــــــــــــر نہیں آتا ان کا دامنِ اقدس
پھر جہاں میں تُو افروز کیسے معتبر ہوتا
نتیجۂِ فکر:افروزاحمد نظامی سدھارتھ نگری

کوچہ ہاۓ طیبہ کی خاک میں اگر ہوتا
بوسےتلووں کے لیتا ان کا جب گزر ہوتا
سر کے بل مدینے کی راہ سے گزر ہوتا
“خلد زارِ طیبہ کا اس طرح سفرہوتا ”
نقش پاۓ اقدس کا سینے میں چھپا لیتا
آدمی نہ ہو کر میں کاش اک حجر ہوتا
با ادب مدینے میں نعت گنگناتا میں
وقت میرا اس در پر اس طرح بسر ہوتا
کاش اے دلِ مضطر روتا انکی یادوں میں
آنکھ سے نکلتا جو اشک وہ گہر ہوتا
نورِ شاہِ بطحا کا صدقہ گر نہیں ملتا
ظُلمتوں کے ساۓ میں آج ہر بشر ہوتا
نعلِ پاکِ سرور جو سر پہ رکھنے کو ملتی
عنبرِ شکشتہ دل تو بھی تاجور ہوتا
محمدجسیم خان عنبر
رانچی

شہر مصطفی تیری گرد میں اگر ہوتا
اپنے آپ پر نازاں پھر میں عمر بھر ہوتا
اے نصیب گرمیرا طیبہ کا سفر ہوتا
میں یہاں کہاں ہوتا میں تو عرش پر ہوتا
اے غبار طیبہ تو سرمہ نظر ہوتا
دیکھنا مرا اس کے بعد کار گر ہوتا
قول راہ پر ہوتا فعل ہمسفر ہوتا
زندگی کا ہر لمحہ کتنا معتبر ہوتا
نعت مصطفی سنجر تو اگر نہیں پڑھتا
اتنا با اثر ہوتا؟ اتنا نامور ہوتا؟
سنجر کلکتہ

لطف دیدِ آقا کا میری آنکھ پر ہوتا
وقت انکے جلوں کا خواہ مختصر ہوتا
دل رسولِ اکرم کے عشق کا جو گھر ہوتا
دل پہ نفس کا ہر اک وار بے اثر ہوتا
دل خجل خجل ہوتا،آنکھ اشک برساتی
“خلد زار طیبہ کا اس طرح سفر ہوتا”
مجھ کو دیکھنے والے کہتے ان کا دیوانہ
عشق مصطفیٰ مجھ میں کاش اس قدر ہوتا
ان کے پاک تلوں کے لمس کا شرف پاتا
میرا دل اگر کاشف ان کا سنگ در ہوتا
✍🏼 از…… ڈاکٹر کاشف بریلوی

انکا سایٕٸہ رحمت دہر پر نہ گر ہوتا
خیر منھ چھپا لیتا سر اٹھاٸے شر ہوتا
مصطفے نہیں دیتے درس جو اخوت کا
خون آدمیت کا بات بات پر ہوتا
معصیت کی جتنی ہیں سب تھکن نکل جاتی
کاش ختم طیبہ میں عمر کا سفر ہوتا
ہم گناہگاروں کو جو چھپا لے دامن میں
کون ایسا جز تیرے شاہ بحر و بر ہوتا
مصطفی نے رکھ لی ہے لاج ہم غلاموں کی
عشق کا محل اپنے ورنہ اک کھنڈر ہوتا
ٹوٹ جاتی سانسوں کی ڈور یا نبی کہکر
دل میں ہجر طیبہ کا درد اسقدر ہوتا
نعت شاہ بطحا کی روشنی سے روشن ہے
پھر تخیل حافظ کیوں نہ معتبر ہوتا
حافظ اشرفی

میری شاعری میں کچھ اور ہی اثر ہوتا
سامنے ترا چہرہ میرے آقا گر ہوتا
حال دل سنانے کی میری بھی تمنا ہے
یا خدا مدینے کا میرا بھی سفر ہوتا
کرتے پھر اشارہ تو ہاتھ باندھ کر آگے
شمس اک طرف ہوتا اک طرف قمر ہوتا
ہتھکڑی ہو ہاتھوں میں بیڑیاں ہو پاؤں میں
خلد زار طیبہ کا اس طرح سفر ہوتا
نرم وہ مرے دل کو کرتے پاۓاقدس سے
کاش راہ طیبہ کا میں بھی اک حجر ہوتا
مدحت شہا میری زندگی کا مقصد ہو
مقصد شہ دیں میں دن مرا بسر ہوتا
روح قبض کرنے کو جب ملائکہ آتے
آپ کے در اقدس پہ جھکا ظفر ہوتا
ظفر انور حمیدی
بینگلور

دل میں حسرتیں لاکھوں دیدہ تر بتر ہوتا
خلدِ زارِ طیبہ کا اس طرح سفر ہوتا
قلبِ مضطرب کو میرے چین مل ہی جاتا اگر
سامنے نگاہوں کے ان کا سنگِ در ہوتا
ذرے کفشِ پاءکے اگر اپنی جھولی میں ہوتے
پانی پانی غیرت سے پھر تو یہ قمر ہوتا
دشمنانِ آقا کا خاک پر غلو ہوتا
اور میرے ہاتھوں میں خنجرِ عمر ہوتا
ان کی نعلِ پاء کے نشاں خود میں میں سمو لیتا
شہرِ جانِ جانا کا میں اگر حجر ہوتا
دل نشیں فضا ہوتی کیا عجب سما ہوتا
خاکِ پاۓ آقا پر گر نظامی سر ہوتا
محمدآزاد رضا نظامی
لکہیم پوری

جانبِ مدینہ پھر مائلِ سفر ہوتا
کاش پھر کرم آقا اس غلام پر ہوتا
رخ ہوائے طیبہ کا اس طرف اگر ہوتا
کس قدر تروتازہ دل کا یہ شجر ہوتا
لوٹ کر نہیں آتا کاش میں مدینے سے
روز گنبدِ خضرا زینتِ نظر ہوتا
کاش مجھ کو مل جاتا ان کا دامن رحمت
قطرہ میرے آنسو کا رشک صد گہر ہوتا
مان لیتا گر ان کو علم غیب کا حامل
پھر ترے بھی ہاتھوں میں خلد کا ثمر ہوتا
بس پکار لینا تھا مشکلوں میں آقا کو
زیر سارے غم ہوتے اور دل زبر ہوتا
آخرش ہوئی پوری ، تھی یہ آرزو اپنی
مصطفے کی مسجد میں خم ہمارا سر ہوتا
شفیق رائے پوری

اُن کے ہوتے دنیا میں پیدا میں اگر ہوتا
زندگی کا ہر لمحہ میری معتبر ہوتا
میں شہید ہوجاتا وہ جنازے میں ہوتے
آخری سفر میرا کیا ہی خوب تر ہوتا
خاک بوسے لے لیتی بڑھ کے پائے اقدس کے
جب بھی میری تربت سے آپ کا گُذر ہوتا
فیض روئے انور کا گر اِسے نہیں ملتا
اسقدر نہ نورانی چہرہِ سحر ہوتا
گیسوئے منوّر میں کچھ تو ہے کشش’ ورنہ
جشن جگنوؤں کا کیوں رات رات بھر ہوتا
اُن کو عِلم ہوجاتا عرض کرنے سے پہلے
دل کا مدّعا میرے اِتنا زود اثر ہوتا
جب بھی چاہتے کرتے آنا جانا ہم “رضوان”
کاش اُن کے روضے سے گھر قریب تر ہوتا
از قلم محمد رضوان قادری بریلی شریف

عـید مـیری ہـوجـاتـی کاش یہ اگـر ہـوتا
کاش ان کی نگری سے میرا بھی گزر ہوتا
پیر پھر کہاں رکھتے آپ کے سبھی عاشق
آپ کا اگر سایہ اس زمین پر ہوتا
باد شاہوں سے بڑھ کر ناز کرتا قسمت پر
کاش شہرِ طیبہ میں میرا ایک گھر ہوتا
ایک ذرہ ہوتا میں کاش شہرِ طیبہ کا
پھر میں سب کی نظروں میں کتنا معتبر ہوتا
میں مدینے کو جاتا اور وہیں پہ مرجاتا
زندگی کا میری یہ آخری سفر ہوتا
پاؤں کپکپا جاتے جان بھی نکل جاتی
خلد زار طیبہ کا اس طرح سفر ہوتا
طیبہ میں بلا لیتے اس فقیر ازہر کو آقا
زندگی کا پھر اس کی سپنہ کارگر ہوتا
نواب ازہر رامپوری

آپ کے قدم ہوتے اور میرا سر ہوتا
اس حسین عالم میں آخری سفر ہوتا
لب پہ نعت کے نغمے دل میں یاد آقا کی
خلد زار طیبہ کا اس طرح سفر ہوتا
رتبہ میرا بڑھ جاتا تاجداروں سے زیادہ
کاش شہر طیبہ میں میرا ایک گھر ہوتا
جس پہ میرے آقا نے قدم ناز رکھے تھے
کاش اے مرے مولی میں وہی حجر ہوتا
مصطفی کی آمد جو دہر میں نہیں ہوتی
نہ شجر ، حجر ہوتے نہ کوئی بشر ہوتا
دین مصطفیٰ پر یوں انگلیاں نہیں اٹھتیں
سینوں میں اگر سب کے جزبۂِ عمر ہوتا
نوکری جو مل جاتی شہر طیبہ میں ساقی
پھر تو میری قسمت کا تارہ اوج پر ہوتا
از قلم ✍
غــــلام غـــوث ســاقــی تــنــویــری
گــورا چــوکــی گــونــڈہ (یــوپــی)

نعتِ رسولِ اکرمﷺ
ـــــــــــــــــــــــــــــــــ
گر کبھی مدینے میں دن میرا بسر ہوتا
چشم کیا یہ میری ہیں قلب بھی نذر ہوتا
اج جو تُو روشن ہے روشنی نہیں ہوتی
ان کے رخ کا صدقہ گر، نا ملا قمر ہوتا
ان سے فیض پاتے ہیں عالمِ خلائق سب
بـے تصورِ جاناں ۔۔۔۔ کب یہاں بشر ہوتا
گر وہی نہ ہوتے تو باغ کیا بہاریں کیا
نا جہاں میں گل کوئ نا یہاں ثمر ہوتا
گر ہمیں اجازت ہو بات کچھ بتانے کی
ذکر ان کا بس ان کا شام اور سحر ہوتا
پھول کا ادب کرتا خار کا ادب کرتا
خلد زارِ طیبہ کا اس طرح سفر ہوتا
با ادب سلامی دی جس جگہ پہ پہچے ہم
خاک ہوتی طیبہ کی۔۔۔ یا حجر شجر ہوتا
یَا عِبَادِی کہ کے جب رنج سب مٹائے ہیں
کیوں درود پھر نا ہاں اس زبان پر ہوتا
ہم نہ جان پاتے ہاں نجد کے منافق کو
گر نبی ہمارا وہ ۔۔۔ ہم سے بے خبر ہوتا
گر غلام ہو جاتا ، نجدیا! نبیﷺ کا تو
رنج سب مٹاتے وہ، یوں نہ در بدر ہوتا
گر کبھی بلاتے وہ در پہ اپنے طارق کو
روح چین پا جاتی رنج و غم مفر ہوتا
۔۔۔۔۔۔۔۔۔۔۔۔۔۔۔۔۔۔۔۔
محمد طارق علی رضوی

حضرات گزشتہ مشاعروں کی طرح پچھلے دنوں بھی آپ سب کے محبوب عالمی واٹسپ گروپ “بزم نعت” کا سترواں شاندار طرحی مشاعرہ منعقد ہوا.
جسکا مصرع طرح تھا.
“اُن کـے کـــــــرم سـے بـات بنی ہے”
اس مصرع کے تحت دنیا بھر سے کافی شاعروں نے اپنے اپنے کلام پیش کئے.
اور 18 لوگوں نے وقت مقررہ پر اپنا کلام مقابلے میں شرکت کے لئے بھیجا۔
یہاں وہ سارے کلام مکمل پیش ہیں ملاحظہ ہوں.
نعت رسول مقبول ﷺ
اُن کـو خَـــبَـر ہَـر اِک شَـئ کـی ہے
اُن کی نَـظَـر سـے کیــا مَـخـفِـی ہے؟
عَــــــرش پـہ آقــــــا کیسے پـہـنچـے؟
آج بھـی دُنیــــــــــا ســـوچ رہـی ہے
سـب سـے اَفــضَـل سـب سـے بـر تـر
بَــعـــدِ خُـــــــــدا بَـس ذاتِ نَـبِـی ہے
اُن کا رَوضَــــــــــــــہ رَشـــکِ جَـنَّـت
نـازِ جِـنـــاں اُن کـی ہـی گَلـی ہے
اِس بـابَـت قُـــــــرآں ہـے شــــــــــاہِد
اُن کی خوشی میں رب کی خوشی ہے
مـیں مُـجـــــــرِم بَـد کار ہـوں لیــکن
“اُن کـے کـــــــرم سـے بـات بنی ہے”
کاش ، پـسـنـد آ جـــــــــــائے اُن کـو
میں نے جـو راحتؔ ! نـعـت کـہی ہے
______از راحتؔ انجـم (ممبئی)______
۔۔۔۔۔۔۔۔۔۔۔۔۔۔۔۔9892020938۔۔۔۔۔۔۔۔۔۔۔۔۔۔۔۔

کِشتِ عمل میں برف جمی ہے
مِہرِ کرم سے آس لگی ہے
لب پر میرے ذکرِ نبی ہے
منھ میں زباں رس گھول رہی ہے
زلفِ مُنوّر کی برکت سے
جگنو کی قسمت چمکی ہے
یہ جو شفٙق ہے شام و سحر کی
اُن کے ہونٹوں کی سُرخی ہے
کہتے ہیں یہ چاند ستارے
کتنا مُنوّر پائے نبی ہے
محشر میں اے کاش کہیں وہ
یہ تیری حالت کیسی ہے ؟
اے”رضواں”سرکار کے در پر
خاموشی بہتر ہے بھلی ہے
از قلم محمد رضوان قادری بریلی شریف

جب سے ولادت انکی ہوئی ہے
گلـشـن گلــشــن ہــریـالــی ہـے
شـہـرِ مَـدِیـنَـہ تـیرِی زَمِیں پَـر
جَــنَّـت جـیـــسِـی آبَـادِی ہــے
حور و ملائک جس میں آئیں
نـوری نـوری تـیـری گلــی ہے
آو فـرشــتـوں رنـگ جـمــاؤ
میرے نبی کی بات چـلی ہے
جـنــت انـکــی کـوثـر انــکا
میرے نـبی کی بات بڑی ہے
اپنا بنایا مجـھکو انہوں نـے
یـہ تـو انـکی دریا دلـی ہـے
نعتِ نَبِی پَڑھنے سے اَزہَــر
کِس دَرجہ رَاحَت مِلتِی ہے
نواب ازہر

چاروں جانب دھوم مچی ہے
میلاد نبی ، میلاد نبی ہے
داخل جنت ہے وہ بشر ہی
جس کو اجازت انکی ملی ہے
جس کو ملی ایمان کی دولت
اس دنیا میں سب سے دھنی ہے
میرے دل میں عشق نبی کی
آگ سدا جلتی رہتی ہے
طہ اور یاسین پکارو
کیونکہ انکی شان بڑی ہے
خوشبو آئی جیسے نبی کی
بھینی ہوا مہکی مہکی ہے
رکھنا ظفر یہ یاد ہمیشہ
بعد خدا وہ ذات بڑی ہے
ظفر انور حمیدی
بینگلور

بزم حبیب پاک سجی ہے
ان کے کرم سے بات بنی ہے
سرور عالم کی آمد پر
شرق وغرب میں دھوم مچی ہے
اسرا کی شب عرش اعظم
ذات شہ ابرار گئ ہے
ڈوبا سورج واپس آیا
آقا کی جب انگلی اٹھی ہے
باب خیبر جس نے اکھاڑا
شیر خدا وہ مولی علی ہے
حشر میں اسکی بخشش ہوگی
جس کے دل میں عشق نبی ہے
فیض رضا سے میں نے عارف
نعت رسول پاک کہی ہے
ازقلم عارف رضا عارف
ھزاری باغ جھارکھنڈ

جھوم کےرحمت کیوں آئی ہے
شاہ امـــــــم کی بات چلی ہے
کون ہـــــــوا مقصـــــــود آدم
وہ تو مــیرا پـــــــیارا نبی ہے
راہ سے جب بھی گـــزریں آقا
عطر فشاں ســاری ہی گلی ہے
ان کی شان و عظمت دیکھــو
عرش حق پــــــر پاے نبی ہے
دیکھا میں نے گنبد خضــــــرا
“ھــــــــــذا من فضل” ربی ہے
آؤ ذرا تـــــــــم نعت ســـــناؤ
ذکر نبی کی بـــــزم سجی ہے
کیسے وصال آقا تک پہنچے
“ان کے کرم سے بات بنی ہے”
وصال احمد وصال اعظمی

سانسوں کی ڈور ان سے بندھی ہے
یاد ان کی رگ رگ میں بسی ہے
چمک رہا ہے سارا عالم
سب فیض انوار نبی ہے
رب نے انہیں بے مثل بنایا
ان کی عظمت بہت بڑی ہے
ان کی سواری اسری کی شب
سدرہ سے بھی آگے گئ ہے
جس پہ فدا ہیں خلد کی حوریں
وہ مرے آقا کی بیٹی ہے
شافع محشر کا ہوں دوانہ
میرا ٹھکانہ جنت ہی ہے
جس نے نبی کا روضہ دیکھا
احمد وہ قسمت کا دھنی ہے
علی احمد رضوی بلرام پوری

بیشــــک وہ قسمت کا دھنی ہے
جس کی جبیں اس در پہ جھکی ہے
حشر کی تپتی دھوپ کا کیا ڈر
چادر رحــمت ســـر پہ تنی ہے
جھوم رہے ہیں حور و ملائک
لب پہ ہمــــارے نعت نبی ہے
بیٹھا تھا میں ان کے در پــــر
یاد مجھے اب تک وہ گھڑی ہے
جـــن کے قبضے میں ہے جنت
میری جـــنت ان کـی گلی ہے
بے مانگے بھرتا ہے دامــــــن
ایسا وہ دربـــــــار سخی ہے
ان کے کرم سے ریاض شمسی
تیری قســـمت چمک رہی ہے
محمد ریاض حسین خان قادری تیغی شمسی
دار العلوم تیغیہ شمس العلوم
رکسہا شریف، غازی پور ، یوپی

سارا عالم نو را نی ہے
جشنِ نبی کی دھوم مچی ہے
میں جو ہوں طیبہ کا مسافر
ساری عطا یہ آقا کی ہے
صحرا صحرا گلشن گلشن
ان کی ہی خوشبو پھیلی ہے
کام بنا پھر ان کی ہی عطا سے
چشم کرم پھر ان کی ہوئی ہے
جس کا رتبہ سب سے اعلیٰ
میرا نبی وہ میرا نبی ہے
دونوں جہاں میں میری ہر اک
ان کے کرم سے بات بنی ہے
نعت کی شکل میں ہم کوحامد
پھر دید آج آقا کی ہوئ ہے
محمد حامد رضا قادری نعمانی
سمستی پوری

خَلق میں ان پر کیا مخفی ہے
ذاتِ خالق جب نہ چھپی ہے
کون کہاں ہے کس عالم میں
ان کی نظر سب دیکھ رہی ہے
کوئی نہیں ہے ان کے جیسا
بات حقیقت پر مبنی ہے
نارِ سقر جو سرد کرے گی
دل میں ایسی آگ لگی ہے
آقا کے دیدار کی خاطر
مجھ کو مرنے کی جلدی ہے
رشکِ باغِ جنتِ رضواں
طیبہ کی ہر ایک گلی ہے
نعتِ نبی کے صدقے “رضوی”
فکر مری پروان چڑھی ہے
از…نورالہدیٰ رضوی ____(دربھنگہ بہار)_____

سارے جہاں میں دھوم مچی ہے
میرے نبی کی جلوہ گری ہے
قاسمِ نعمت ہیں مرے آقا
ساری خدائی در پہ کھڑی ہے
کوئی نبی اب آ نہیں سکتا
مہرِ نبوت ان پہ لگی ہے
خاکِ شفا کہتے ہیں جس کو
شہرِ مدینہ کی مٹی ہے
سونچ سنبھل کر چلنا زاہد
شہر نبی ہے شہر نبی ہے
چاند کو جس نے چیر دیا ہے
وہ مرے آقا کی انگلی ہے
نعتِ نبی کے صدقے انجؔم
سوئی ہوئی تقدیر جگی ہے
نتیجۂ فکر
✍🏻 پریزادہ محمد انجم رضا حقانی
ٹانڈہ امبیڈکر نگر.

محبوب رحمن وہی ہے
جس کےصدقےدنیابنی ہے
چیر دیا ہے چاند نے سینہ
جب آقا کی انگلی اٹھی ہے
جب مسکائے پیارے نبی تو
فورا کھوئی سوئی ملی ہے
صل علی جب آیا لبوں پر
ساری مصیبت سرسےٹلی ہے
شہر نبی کی لینے بلائیں
تاروں کی بارات چلی ہے
حال ہمارا مت پوچھو بس
ان کے کرم سے بات بنی ہے
برکاتی آمد پہ نبی کی
ہر کوچہ ہر گلی سجی ہے
محمد نعیم رضا برکاتی گونڈوی

میرے نبی کی بات چلی ہے
بارش رحمت ہونے لگی ہے
آدم سے عیسی تک سب کی
“ان کے کرم سے بات بنی ہے”
نعت شہ ابرار کے صدقے
ہر اک آفت سر سے ٹلی ہے
آئے جب سلطان مدینہ
روشنی جگ میں پھیل گئی ہے
ساری دنیا جھولی پسارے
دیکھو ان کے در پہ کھڑی ہے
مٹ جائے طیبہ سے ہماری
آقا جتنی بھی دوری ہے
تو ہے شاہِ دیں کا ثنا خواں
شارؔق تیری خوش بختی ہے
سید شارق رضا خالدی شاہجہاں پوری

ِباغ ارم کے جیسی سجی ہے
شہر طیبہ کی وہ گلی ہے
میں بھی آؤں در پر آقا
دل میں اک ہل چل سی مچی ہے
محشر میں سب عاصی بو لے
آمد شاہ بطحا ہوئی ہے
مولا علی کے نام سے یارو
ہر مشکل اک پل میں ٹلی ہے
چاند نے سینہ چاک کیا ہے
جب آقا کی انگلی اٹھی ہے
یہ ہے دیار سرور عالم
اکڑ کے چلنا بے ادبی ہے
عاشق ہے غفران اسی کا
جس کیلیے یہ دنیا بنی ہے
محمد غفران قادری
سعداللہ نگر بلرام پور

دل کی تمنّا دیدِ نبی ہے
آگے آقا کی مرضی ہے
جس میں جتنا عشق نبی ہے
وہ دل اتنا ہی نوری ہے
جس کے دل میں عشق نبی ہے
ہر میدان کا وہ غازی ہے
جب سے ان کی نعت لکھی ہے
فکر مری مہکی مہکی ہے
آئو فرشتوں تم بھی سن لو
میں نے انکی نعت لکھی ہے
ان کو خود سا مت کہ دینا
یہ غدّاروں کی بولی ہے
کاشف ان کے در کی غلامی
جان لٹا کر بھی سستی ہے
از✍🏼 ۔۔۔۔۔۔ڈاکٹر کاشف بریلوی

شب فرقت کی کب گزری ہے
یادِ نبی جب دل میں بسی ہے
جن کا لقب ہے شافعِ محشر
ان کے لیے یہ دنیا بنی ہے
ان کو خود سا کہنے والے
یہ تو تیــری بَد بخـتی ہے
کہتے ہیں سب حور و ملائک
نور کا پیکر میرا نبی ہے
بھیجو درود اپنے آقا پر
قرآں میں حکمِ ربّی ہے
بن دیکھے سب ہوۓ دوانے
سیرت انکی لا ثانی ہے
از قلم مجاہد اختر خان
۔۔۔۔۔۔ دربھنگہ ۔۔۔۔۔۔۔بہار

اول و آخر؛؛؛؛؛؛ میرا؛؛؛؛نبی ہے
جان جہاں واللہ وہی ؛؛؛؛؛ ہے
دونوں جہاں میں ان کے ہی صدقے
عزت و عظمت اپنی ؛؛؛؛؛؛بڑھی ہے
مچل اٹھی ہے حشر میں امت
انا لھا کی دھوم ؛؛؛؛؛؛ مچی ہے
کون گیا ہے قصر دنی تک
وہ تو بس اپنا ہی نبی ہے
جس دم نعرئہ غوث ؛؛؛؛لگایا
آئی مصیبت پل میں ٹلی ہے
فرش زمیں سے عرش بریں تک
میرے نبی کی ؛؛؛؛؛جلوہ گری ہے
چوم لے انور نام ؛؛؛؛؛؛ شہہ دیں
نظر کی وسعت بڑھ جاتی ہے
ازقلم
غلام انورجامعی
سعداللہ نگر
بلرامپور

زلف نبی کی بات چھڑی ہے
ساری فضا مہکی مہکی ہے
میرے نبی کے دست کرم میں
لوح و قلم عرش و کرسی ہے
سر پہ ہے انکے تاج شفا عت
ہاتھ میں جنت کی کنجی ہے
کھارا پانی کردے میٹھا
ایسا لعاب پاک نبی ہے
جلوہ گہ سلطان مدینہ
قصر جنت کے جیسی ہے
سب میں مقدس تو ہے شاہا
سب سے نرالی ذات تری ہے
حافظ نعت پاک پیمبر
منھ میں مصری گھول رہی ہے
حافظ اشرفی

السلام علیکم
حضرات گزشتہ مشاعروں کی طرح پچھلے دنوں بھی آپ سب کے محبوب عالمی واٹسپ گروپ “بزم نعت” کا چھیانسٹھواں شاندار طرحی مشاعرہ منعقد ہوا.
جسکا مصرع طرح تھا.
“شہرِ نبی ہے خلد کی تصویر ہوبہو”
اس مصرع کے تحت دنیا بھر سے کافی شاعروں نے اپنے اپنے کلام پیش کئے.
اور 11 لوگوں نے وقت مقررہ پر اپنا کلام مقابلے میں شرکت کے لئے بھیجا۔
یہاں وہ سارے کلام مکمل پیش ہیں ملاحظہ ہوں.
نعت رسول مقبول ﷺ
کہئیے نہ اس کو نازش کشمیر ہوبہو
شہر نبی ہے خلد کی تصویر ہوبہو
طاق حرم ہے ابروئے محبوب کبریا
موئے بدن ہے نور کی تحریر ہوبہو
يارب متاع عشق محمد نواز کر
کردے اسیرزلف گرہ گیر ہوبہو
اصحاب کوسکھایاتھا قرآں نےجو ادب
کرتے تھے وہ رسول کی توقیر ہوبہو
بےعیب تھی رسول کی سرتاپا زندگی
اخلاق کبریا کی تھی تصدير ہوبہو
اک بار چشم ناز جو کردیں مرے کریم
ہوجائے میری خاک بھی اکسیر ہوبہو
افضل جناب غوث کی ہر اک ادامیں دیکھ
کردار مصطفٰی کی ہے تعمیر ہوبہو
شاہ محمد افضل قادری دارالعلوم قادریہ دائرہ شاہ احمد ٹیڑھی بازار غازی پور یو پی

رخسار مصطفے ہے وہ تصویر ہو بہو
آیات والضحی کی ہے تفسیر ہو بہو
رضوان آ کے شہر مدینہ کی سیر کر
شہر نبی ہے خلد کی تصویر ہو بہو
لو چاک کر کے دیکھ لو قلب وجگر مرا
پاو گے اس میں یار کی؛؛؛ تنویر ہو بہو
دست رسول پاک کا اعجاز ؛؛؛؛؛خوب ہے
ٹہنی کو جس نے کردیا شمشیر ہو بہو
جھلسےہیں جس سے دہر کےگستاخ مصطفے
احمد رضا کی برق ہے ؛؛؛؛؛؛؛؛؛؛ تحریر ہو بہو
غفلت شعار پائیں ہدایت کی روشنی
میری زباں میں کر خدا تاثیر ہو بہو
انور نبی کے عشق میں یوں لب کشا رہو
ہر لفظ حق کی کرتا ہو ؛؛؛ تشہیر ہو بہو
ازقلم
🖊 غلام انورجامعی قادری
سعداللہ نگر بلرامپور
یوپی انڈیا

دکھلاؤ دوجہاں میں وہ تعمیر ہوبہو
طیبہ نگر کے جیسی ہو تصویر ہوبہو
ہر عضو ہےرسول کا قدرت کا شاہکار
ممکن نہیں بیان ہو تعبیر ہو بہو
ہے منسلک جو عشق نبی سے کڑی کڑی
ہاتھوں میں اپنے ہے وہی زنجیر ہوبہو
اک اسم مصطفیٰ میں جو مفہوم ہےنہاں
تشنہ ہے اس کی آج بھی تفسیر ہوبہو
یہ معجزہ تودیکھیئےمیدان بدرمیں
لکڑی بنادی آپ نے شمشیر ہو بہو
بتلا گئے جو غیب کے حالات مصطفیٰ
ہے مثل شمس انکی بھی تصدیر ہوبہو
اے درد خود کو پائےگا آقا کے قرب میں
زم زم کے جیسی دل کی ہو تطہیر ہوبہو
مسعود احمد مصباحی درد جالونی

نام نبی ہے قلب پہ تحریر ہوبہو
عشق ووفا خلوص کی تفسیر ہوبہو
پائے شہ انام کا اعزاز دیکھئے
شہر نبی ہے خلد کی تصویر ہوبہو
روضہ نبی کادیکھ کے محسوس یہ ہوا
جیسے ہو میرے خواب کی تعبیر ہوبہو
أکر در رسول پہ کوئ چمٹ گیا
جیسے ہواہل کہف کا قطمیر ہوبہو
مولی علی وفاطمہ حسنین ومصطفے
یہ پنجتن ہیں باعث تسخیر ہوبہو
قلب حزیں ہے گلشن عشق رسول پاک
قرباں یے اس پہ وادئ کشمیر ہوبہو
فاروق بھی غلام ہے سرکار دوجہاں
بڑھتا رہیگا جذبہ توقیر ہوبہو
فاروق مصباحی
پرنسپل جامعہ مخدومیہ رضویہ امین پوروہ جھوڑیا سعد اللہ نگر بلرام پور

منظر میں ، بو و نور میں دلگیر ہو بہو
،، شہر نبی ہے خلد کی تصویر ہو بہو
اتنے نسیم یاد نبی نے کھلاے پھول
دل کا چمن ہے وادئی کشمیر ہو بہو
قرآ ن کے نزول سے رب کی ہے جو مراد
کی ہے عمل سے آقا نے تفسیر ہو بہو
لفظوں سے حق ادا نہ ہوا ان کی مدح کا
ملتی نہیں خیال کی تعبیر ہو بہو
ما نگیں جوان سے انکی محبت ہی مانگئے
جنت تو ہے رسول کی جاگیر ہو بہو
رحمت مرے نبی کی ہے رحمان کی عطا
ملتی ہے اس میں پیار کی تاثیر ہو بہو
حسا ن ایسا عشق و ادب ، فکر ہو کفیل
ہوتی ہے نعت تب کہیں تحریر ہو بہو
کفیل فتحپوری
مدرسہ شمس العلوم سنگاٶں
فتحپور یوپی

گر زندگی ہو دین کی تصویر ہوبہو
تو آدمی ہو صدق کی تنویر ہوبہو
جس رخ سے بھی حضور کی سیرت کو دیکھئے
وہ ہیں کلامِ پاک کی تفسیر ہوبہو
جسکا تقاضا ہم سے ہے قرآنِ پاک میں
کیجے وہی معاشرہ تعمیر ہوبہو
ہم پیرویء حضرت حسان میں تو ہیں
لیکن کہاں ہے خوبیء تقدیر ہوبہو
نظریں جمی تھی کنبد خضریٰ کے حسن پر
احساس کھنچتا رہا تصویر ہوبہو
از۔۔۔✍🏼۔۔۔ڈاکٹر کاشف بریلوی

رضواں سی ہم نے پائی ہے تقدیر ہو بہو
شہر نبی ہے خلــــد کی تصویـــر ہو بہو
سر تا بہ قدم آپ کی تصویر ہو بہو
ہے بس کلام پاک کی تحریر ہو بہو
رہتا ہے دل مدینے کی گلیوں میں ہر گھڑی
یاد نبی ہے زلف گـــرہ گیـــر ہو بہو
باطل کے گڑھ میں کشتوں کے پشتے لگا دیئے
تقریـــر آپ کـی تھی کہ شمشیر ہو بہو
اپنا جنون عشق تو مثل اویس ہے
اے کاش ہو اویس سی تقدیر ہو بہو
حسنین کو جو دیکھا تو لوگوں نے کہ دیا
بے شک ہیں یہ حضور کی تصویر ہو بہو
ویسے تو لوگ نقل میں کوشاں ہیں اے ریاض
ملتی کہاں ہے آپ سی تحریر ہو بہو
محمد ریاض حسین خان قادری تیغی شمسی
دار العلوم تیغیہ شمس العلوم
رکسہا شریف، غازی پور ، یوپی

محفل نبی کی محفل تنویر ہو بہو
نعرہ نبی کا نعرۂ تکبیر ہو بہو
جیسا کہا حضور نے میدان بدر میں
ویسی ہی دیکھی دنیا نے تصویر ہو بہو
ٹکڑے کریں وہ چاند کے سورج کو پھیردیں
ہے کون ان سا صاحب تسخیر ہو بہو
ہے ہی نہیں کسی بھی دواۓ طبیب میں
تعویذ نقش پا کی سی تاثیر ہو بہو
مالک بنایا ہے انھیں خالق نے خلد کا
تبشیر ان کی، اللہ کی تبشیر ہو بہو
طیبہ نگر میں موت ملے، یہ دعا مری
کرلے قبول کاتب تقدیر ہو بہو
پا مال کیسے ہو گا خزاں میں خلیل یہ
شہر نبی ہے خلد کی تصویر ہو بہو
خلیل الله نظامی مصباحی
جامعہ صمدیہ دارالخیر پھپھو ند شریف

چہرے پہ انکے دیکھو، ہے تنویر ہو بہو
حسنین ، مصطفیٰ کی ہیں تصویر ہوبہو
جنت میں جا کے انکا کہے گا یہ امتی
شہر نبی ھے خلد کی تصویر ہو بہو
صلی علی کا لب پہ ترانہ ہو بار بار
رنج و الم کی پاؤگے اکسیر ہوبہو
حکم نبی سے ماہ ہوا تھا فلک پہ شق
پاکر ہوا اشارہ بغلگیر ہوبہو
دل میں ظفر عمارت کعبہ بنا لے ایک
ہو جائے انکے عشق کی تعمیر ہوبہو
ظفر انور حمیدی
بینگلور

اللہ کے حبیب کی تقریر ہو بہو
قرآں کی آیتوں کی ہے تفسیر ہو بہو
جنّت جودیکھنی ہےتوطیبہ کو جایٸے
شہرِ نبی ہے خلد کی تصویر ہو بہو
حسنین کی حیاتِ مقدس میں دیکھٸے
کردارِ شاہ بطحا کی تنویر ہو بہو
چہرے پہ ملٸے آنکھوں کا سرمہ بنایٸے
خاکِ در رسول ہے اکسیر ہو بہو
لذت نبی کے عشق کی تم چاہتے ہو گر
اصحابِ جیسی تم کرو توقیر ہو بہو
قولِ رسولِ پاک میں کتنی ہیں حکمتیں
ممکن نہیں ہے اس کی تعبیر ہو بہو
عنبر اسی میں راز ہیں مخفی فلاح کے
اپنا لو دل سے سنّتِ شبیر ہو بہو
محمد جسیم خان عنبر
رانچی

کرتے ہیں اس لئے سبھی تشہیر ہو بہو
شہـــــرِ نبی ہے خلد کی تصویر ہو بہو
رب کی رضا کے واسطے کرتے رہو سدا
اصحاب سی حضـور کی توقیر ہو بہو
حسّان نے جو کی ہے ثنـــــائے شہِ امم
ملتی نہیں کسی میں وہ تاثیر ہو بہو
ابلیس ہو لعین یا گستاخ نجـــــــــــــــــدیا
کیجےجہاں میں دونوں کی تحقیر ہو بہو
خطّ تواَم کے مثل ہیں پیارے حسن حسین
اوراق صــــــــرف دو ہیں” ہے تحریر ہو بہو
تاریخ ہے گواہ کہ جسمِ رسُــــــول میں
آدھے حسن ہیں آدھے ہیں شبّیر ہو بہو
بے مثل و بے مثــال ہے ذاتِ رسولِ پاک
افروز کیا ہو تجھ سے پھر تعبیر ہو بہو
نتیجۂِ فکر:افروزاحمدنظامی سدھارتھ نگری

یہ وہ 11 کلام تھے جو مقابلہ میں شامل ہوۓ..
اس مرتبہ بھی بزم نعت گروپ کے مقابلہ میں ججوں کے پینل نے سارے کلاموں کو نمبرات سے نوازا…
اس کےنتائج آپ کے سامنے پیش ہیں….
پہلے آپ ہمارے فیصل پینل سے ملاقات کر لیں..
جج پینل میں 4 معزز لوگ شامل ہیں
…جج پینل….
1 استاذالشعراحضرت علامہ الحاج الشاہ مفتی صغیر اختر مصباحی صاحب قبلہ ، بریلی شریف.
2 استاذالشعرا حضرت علامہ سراج تابانی صاحب قبلہ ، کلکتہ
3 حضرت علامہ طفیل علوی صاحب قبلہ جھارکھنڈ.
4 رئیس القلم شاعر ذی وقار حضرت علامہ الشاہ مفتی احسن کمال رضوی صاحب قبلہ ، بنارس.
بزم نعت کے مقابلہ میں شرکت کے لئے آنے والے کلاموں کو چار الگ الگ زاویوں سے جانچا پرکھا جاتا ہے
1- حسنِ فن
2- حسنِ مضمون
3- حسنِ زبان
4- حسنِ بیان
مذکورہ عناوین کو مد نظر رکھتے ہوئے جج حضرات کا پینل فیصلہ سناتا ہے
1- حسنِ فن یعنی کلام کی فنی اور عروضی نزاکتوں، خوبیوں اور خامیوں کو دیکھتے ہوئے حضرت علامہ مفتی صغیر اختر مصباحی صاحب قبلہ کلام کو نمبرات عنایت فرماتے ہیں.
2- حسنِ مضمون یعنی کلام میں مستعمل مضامین کس معیار کے ہیں اس کو نظر میں رکھتے ہوئے استاذالشعرا حضرت علامہ سراج تابانی صاحب قبلہ کلام کو نمبرات عنایت فرماتے ہیں.
3- حسنِ زبان یعنی کلام میں استعمال کی گئی زبان کے معیار کو دیکھتے ہوئے حضرت علامہ الشاہ طفیل علوی صاحب قبلہ کلام کو نمبرات عنایت فرماتے ہیں.
4- حسنِ بیان یعنی معنی کی ادائیگی اور معیار کو دیکھتے ہوئے حضرت علامہ الشاہ مفتی احسن کمال رضوی صاحب قبلہ کلام کو نمبرات عنایت فرماتے ہیں.
الحمد لللہ ہمارے پینل نے پوری مستعدی اور ذمہ داری سے اپنے فرائض کو انجام دیا…..
08-11-2018
عالمی واٹسپ گروپ بزم نعت کے فائنل نتائج…..
سرپرستِ “بزم نعت” حضور سید حسان میاں صاحب قبلہ کے حکم پرمنعقد ہوۓ “بزم نعت” کے چھیانسٹھویں طرحی مشاعرہ میں جج پینل کے ذریعہ دئے گئے نمبرات کی تفصیل پیش ہے…
ہمارے پینل میں 4 جج حضرات ہیں جو مختلف عناوین کے تحت ہر کلام کو نمبرات عنایت فرماتے ہیں لیکن اس مرتبہ تین جج صاحبان نے ہی نتائج پیش فرمائے ہیں
ہر عنوان پر زیادہ سے زیادہ 25 نمبر تک مل سکتے ہیں یعنی اس بار ایک شاعر کو زیادہ سے زیادہ 75 نمبر تک ہی حاصل ہو سکتے ہیں.
سبھی جج حضرات کے انفرادی نتیجے آپ دیکھ چکے ہیں…
اب مجموعی تفصیل ملاحظہ فرمائیں.
نام شاعر کل نمبر
1 جناب مسعود احمد درد 63
2 ڈاکٹر کاشف بریلوی 62
3 جناب فاروق مصباحی 57
4 جناب کفیل فتح پوری 57
5 جناب افضل قادری 55
6 جناب ریاض شمسی 54
7 جناب خلیل اللّه نظامی 53
8 جناب غلام انور جامعی 51
9 جناب ظفر انور حمیدی 50
10 جناب عنبر رانچوی 47
11 جناب افروز نظامی 44
اس طرح اس مقابلہ میں حضرت علامہ مسعود احمد درد مصباحی صاحب قبلہ نے 63 نمبر کے ساتھ پہلا ، حضرت ڈاکٹر عدنان رضا کاشف بریلوی صاحب قبلہ نے 62 نمبر کے ساتھ دوسرا اور حضرت علامہ فاروق مصباحی صاحب قبلہ نے 57 نمبر پا کر تیسرا مقام حاصل کیا.
میں تمام اراکین کی جانب سے ان تینوں عظیم شعرا کو دلی مبارکباد پیش کرتا ہوں…..
ان شاء اللّه بہت جلد سرپرستِ “بزم نعت”حضور سید حسان میاں صاحب قبلہ کی جانب سے خانقاہ مسولی شریف کے تحائف تینوں حضرات کو ارسال کر دئے جائیں گے….
خادم بزم نعت. اظھار شاہجہاں پوری

السلام علیکم
حضرات گزشتہ مشاعروں کی طرح پچھلے دنوں بھی آپ سب کے محبوب عالمی واٹسپ گروپ “بزم نعت” کا ترسٹھواں شاندار طرحی مشاعرہ منعقد ہوا.
جسکا مصرع طرح تھا.
“راحت رساں، آرام جاں، تیری ثنا شاہ امم”
اس مصرع کے تحت دنیا بھر سے کافی شاعروں نے اپنے اپنے کلام پیش کئے.
اور 19 لوگوں نے وقت مقررہ پر اپنا کلام مقابلے میں شرکت کے لئے بھیجا۔
یہاں وہ سارے کلام مکمل پیش ہیں ملاحظہ ہوں.
نعت رسول مقبول ﷺ
رکھ لیجے شمعوں کا بھرم یا مصطفیٰ ، شاہ امم
طوفاں صفت ہے وقت کی چلتی ہوا شاہ امم
بزم فلک میں مہر و مہ روے زمیں پر شمع دل
ہر شعبئہ انوار میں تیری ضیا شاہ امم
تسخیر، دل کی سلطنت کرتا رہا خُلق حسن
آباد کاری کا عمل جلوہ ترا شاہ امم
تشنہ لبان دید کو ، تسکین روح و جاں بنیں
یادیں تمہاری چشمئہ آب بقا شاہ امم
اک اوربھی کیجے کرم میں اپنا باطن دیکھ لوں
بدلے مرے دل کی نظر کا زاویہ شاہ امم
مفقود ہے سوز دروں، سازجنوں ، رنگ ادا
بے کیف مدحت گر کی ہے طرز نوا شاہ امم
یادوں سے ہی بہلا کرے کب تک کفیل غم زدہ
ارزاں بھی کر اس کے لئے اپنی لقا شاہ امم
کفیل فتحپوری
مدرسہ شمس العلوم سنگاٶں
فتحپور یو۔۔۔۔پی

محبوبِ ربِ دو جہاں، نورِ خدا شاہِ امم!
تسکینِ دل، آرامِ جاں ،تیری ثنا ،شاہِ اُمم!
میثاق میں چرچا ترا، محشر میں ہے جلوہ ترا
ہر انجمن میں چار سو نغمہ ترا شاہِ امم!
کردار تیرا آئینہ ، گفتار تیری جانفزا
کیسے نہ ہو خلقِ خدا تجھ پر فدا شاہِ امم!
بلبل کو تیری جستجو، قمری کو تیری آرزو
جن و بشر، ہر ایک کا تو مدعا شاہِ امم!
خورشید و انجم کی پھبن اور کہکشاں کی انجمن
ہر اک میں ہے جلوہ فگن ، تیری ضیا شاہِ امم!
تیرے غسالے سے شہا لاکھوں نے پائی ہے شفا
دو بوند مجھ کو بھی عطا ہو جائے یا شاہِ امم!
رشکِ جناں سرور! تری مرقد بنے گی بالیقیں
آجائینگے جس دم وہاں بدرالدجیٰ شاہِ امم
از۔۔۔۔۔ڈاکٹر محمد سرور قادری
میڈیکل آفیسر، بہرائچ شریف

ہر وقت ہے دل کی مرے بس یہ دعا شاہ امم
مرنے سے پہلے دیکھ لوں ؛؛؛گنبد ہرا شاہ امم
کرتا ہے جو صبح ومسا؛؛؛؛؛؛؛؛ مدح وثنا تیری شہا
حاصل ہےاس عاشق کوہی رب کی رضا شاہ امم
دونوں جہاں کو گھوم کر بولے یہی روح الامیں
تم سا حسیں کوئی نہیں پیدا ہوا ؛؛؛؛؛؛؛شاہ امم
محبوب رب تم ہی توہوخیرالبشر تم ہی توہو
اس وا سطے ہے ہر کوئی تم پر فدا شاہ امم
ہونے لگیں رب کے کرم سے رحمتوں کی بارشیں
جب ذ کر محفل میں تر ا ہو نے لگا ؛؛؛؛؛؛شا ہ امم
غوث الورى خواجہ پیااحمد رضا کی ہےصدا
راحت رساں آرام جاں ؛؛؛تیری ثنا شاہ امم
دامن پسارے ہےکھڑا دربار میں آقا؛ نعیم
صدقہ اسے حسنین کا کردو عطاشاہ امم
از قلم
محمد نعیم رضا برکاتی گورا چوکی گونڈہ (یوپی)

شاہ شہاں، جان جہاں، نور خدا شاہ امم
راحت رساں، آرام جاں، تیری ثنا شاہ امم
مہر عرب، ماہ طرب، عالی نسب، والا حسب
بحر سخا، موج وفا، ابر عطا، شاہ امم
جان طلب، کان ادب، امی لقب، محبوب رب
دست شفا، روح دعا،غم کی دوا شاہ امم
ابرو مہ عید طرب، رخسار میں انوار رب
ایسا کوئی ہوتا ہے کب، تیرے سوا شاہ امم
بولے یہی روح الامیں، سب ڈھونڈ کر روئے زمیں
ہے آپ سا کوئی نہیں، اے مہ لقا شاہ امم
گلزار ہست وبود کی، رعنائیاں رنگینیاں
سب ہیں طفیل مصطفٰی صل علی شاہ امم
سرتابسر لطف و کرم، اے دافع کرب و الم
افضل کا بھی رکھ لیں بھرم، روز جزا شاہ امم
شاہ محمد افضل قادری دارالعلوم قادریہ دائرہ شاہ احمد ٹیڑھی بازار غازی پور یو پی
موبائل….. 9795562887

ہر دور میں راہِ خدا کے رہنما شاہِ اُمم
روزِ جزا ہم عاصیوں کا آسرا شاہِ اُمم
رب نے تمہیں قاسم کیا ہر چیز کا شاہِ اُمم
جس کو ملا ، جو کچھ ملا تم سے ملا شاہِ اُمم
مہرِ عرب ، ماہِ عجم ، شمس الضحیٰ ، بدرالدجیٰ
نور الہدیٰ ، خیرالوریٰ ہیں آپ یا شاہِ اُمم
طوفانِ غم میں ہوں گھرا ، اے شاہ بگڑی ہے ہوا
بہرِ خدا سب غم مرے کر دو ہوا شاہِ اُمم
بے نور سا لگنے لگا رخ چودھویں کے چاند کا
جس وقت چمکا پُر ضیا رخ آپکا شاہِ امم
لطف و کرم عادت تری ، جود و سخا شیوہ ترا
یا مصطفیٰ صلے علیٰ نورالہدیٰ شاہِ امم
راحت رساں ،مشکل کشا ،سایہ فگن ہیں پنج تن
شبّیر و شبّر ، فاطمہ ، شیرِخدا ، شاہِ امم
از…..ڈاکٹر کاشف بریلوی

کس پہ نہیں،رحمت تری،تیری عطا شاہ امم
سارا جہاں، زیر کرم، تیرے ہوا شاہ امم
حامد بھی ہیں،محمودبھی،جان جہاں،شان سخا
امّی لقب، دانائے کل بعد از خدا، شاہ امم
مونس بھی ہو،محسن بھی ہو، مختاراورقاسم بھی ہو
نظر کرم، فرمایئے، سوئے گدا، شاہ امم
تجھ سا حسیں،کوئی نہیں،خود حسن ہےصدقہ ترا
حسن زمیں، حسن فلک، جلوہ ترا، شاہ امم
عرش علیٰ، زیر قدم، چاہےخدا، تیری رضا
رتبہ ترا،سب سےالگ، سب سے جدا، شاہ امم
آلام ہوں، دنیاکے یا عقبی کی ہوں ،دشواریاں
ہر جا ہو تم، حامی مرے، حاجت روا، شاہ امم
اس درد کی،سوکھی ہوئی کھیتی کو بھی سیراب کر
ابر کرم، کس پہ نہیں، برسا ترا، شاہ امم
مسعود احمد مصباحی درد جالونی

تو عظمتوں کی انتہا ، میں پرخطا ، شاہ امم
لکھوں تری توصیف کیا ، یا مصطفیٰ ، شاہ امم
تو آ یة ر ب العلی ، تیر ی ادائیں معجزہ
ثا نی نہیں کو ئی ترا ، نو رِ خد ا ، شاہ امم
مہکے ہے تیر ی رہ گز ر ، ذرہ ترا مثلِ گہر
پیزار تیر ی تاج سر ، نو ر الہدیٰ ، شاہ امم
یادیں تری عنبر فشاں ، مہکائے ہیں فکر و گماں
راحت رساں ، آ رام ِ جاں ، تیری ثنا ، شاہ امم
خورشیدِمحشرکی تپن سےجل رہےہوں جب بدن
سر پر رہے سایہ فگن ، تیر ی ردا ، شاہ امم
کٹتی نہیں ہجراں کی شب ، ہو تی نہیں صبحِ طرب
اذن حضوری دے دو ا ب ، ظلِ خدا ، شاہ امم
اخترؔ کےدل کی ہےصدا ، اے کاش ہوں وقتِ قضا
آنکھیں مری جلوہ ترا ، شمس الضحیٰ ، شاہ امم
از : محمد اختر حسین حشمتی
دا را لعلوم گلشن مدینہ
پلٹن بازار ، پرتاپ گڑھ
یو ۔پی
97 21 94 22 97

کر دو عطا ، کر دو کرم ، خیر الوری ، شاہ امم
رب نے تمہیں کوثر دیا کر دو عطا شاہ امم
خیر البشر رتبہ ترا جنت نشاں روضہ ترا
راحت رساں ، آرام جاں ، تیری ثنا ، شاہ امم
والشمس ہے چہرہ ترا ، مازاغ ہیں آنکھیں تری
قرآن تیرا معجزہ بدرالدجی شاہ امم
شاہ عرب ، محبوب رب ، دنیا بنی تیرے سبب
نور مبیں ، عرش بریں ، مسند ترا ، شاہ امن
فاران کی چوٹی سے جب اعلان حق کا ہو گیا
تیرے وسیلے سے ملا ہم کو خدا شاہ امم
جبریل کی ، پرواز بھی ، حیرت سے تکتی رہ گئ
اسریٰ کی شب پہونچے ہو تم قرب خدا ، شاہ امم
تیری ثنا ، مدحت تری ، کرتا ہوا ، عاصی ظفر
شہر نبی ، سوۓ حرم ، یہ بھی چلا ، شاہ امم
ظفر انور حمیدی
بینگلور

مصداقِ وجہِ کن فکاں، صلِ علی شاہِ امم
بعد از خدا، سب سے بڑا، رتبہ ترا شاہِ امم
جوآپ سےپھر جائے گا،تاحشر منہ کی کھائے گا
جو آپ کے گن گائے گا، مسکائے گا، شاہِ امم
ابرِ کرم برسائیے، بہرِ مدد آ جائیے
چشمِ عنایت اب ذرا کن سوئے ما، شاہِ امم
ہے میرے دل کی آرزو، آئے نظر بس تو ہی تو
دیکھے جدھر میری نظر، یا مصطفی شاہِ امم
جس کاسخن وحیِ خدا،جسکی ادا سب سےجدا
جس کے لئے کعبہ جھکا، وہ ہے مرا، شاہِ امم
چہرہ ترا رشکِ قمر،آنکھیں ہیں مازاغ البصر
صد فخرِ والیلِ اِذا زلفِ دوتا، شاہِ امم
نغمے، قصیدے آپ کے، زیرِ لبِ “رضوی” رہیں
شام و سحر، آٹھوں پہر، شاہِ دنٰی شاہِ امم
از…نورالہدیٰ رضوی ____(دربھنگہ بہار)_____

کہتے ہیں یہ ؛ شاہ و گدا ؛ کھاکر ترا ؛ شاہ امم
جتنا ملا ؛ جو کچھ ملا ؛ تجھ سے ملا ؛ شاہ امم
نار جہنم سے کیا تونے رِہا شاہ امم
ہم عاصیوں کو خلد میں پہنچا دیا شاہ امم
دیکھا کروں گنبد ہرا صبح و مسا شاہ امم
طیبہ میں ہو بہر خدا اک گھر مرا شاہ امم
مت پوچھو ہم سے ہیں کہاں نور خدا ؛ شاہ امم
ہم عاشقوں کے دل میں ہیں جلوہ نما شاہ امم
آقا کی جب آمد ہوئ سارا زمانہ جھوم اٹھا
ہر سمت سے اٹھی صدا صد مرحبا شاہ امم
جس دم ملک پکڑے ہوئے لیکر چلیں دوزخ کی اور
مجھ کو چھڑا کر یہ کہیں جنت میں جا ؛ شاہ امم
گھر میں کبھی رکھ دیں قدم مدت سے ہے یہ آرزو
چشم کرم احمد پہ بھی فرمادیں یا شاہ امم
علی احمد رضوی بلرام پوری

رب نے کہا و الشمس ہے چہرہ ترا شاہ امم
والیل ہے زلف دوتا صد مرحبا شاہ امم
ظلم و ستم کی آندھیاں اور نجدیت کی بدلیاں
ایسے میں کیا آخر کرے بندہ ترا شاہ امم
منجدھار میں ہوں میں پھنسا طوفان ہے چاروں طرف
ارحم لنا یا مصطفے صلی علی شاہ امم
مٹ جائیں سب رنج و الم ہوں دور دل سے سارے غم
فرمائیے لطف و کرم مجھ پر ذرا شاہ امم
ہو نزع کا جب وقت میرے لب پہ یہ جاری رہے
” راحت رساں، آرام جاں، تیری ثنا شاہ امم ”
روز جزا یا مصطفیٰ ہوگا فقط جلوہ ترا
اب ہو بھلا بندہ ترا کیوں غمزدہ شاہ امم
مطلع ہو یا مقطع ترا سن لے ریاض غمزدہ
ہر دم زباں پر یہ رہے یا مصطفیٰ شاہ امم
محمد ریاض حسین خان قادری تیغی شمسی
دار العلوم تیغیہ شمس العلوم
رکسہا شریف غازی پور، یو پی

سب سے الگ سب سے جدا تیری ادا شاہ امم
راحت رساں آرام جاں تیری ثنا شاہ امم
شمس و قمر شجر و حجر جن و بشر ارض و سماں
کرتا ہے یہ سارا جہاں تیری ثنا شاہ امم
ٹکڑے ہوا ہے چاند بھی اُلٹے پھرا خورشید بھی
حیرت میں ہیں سب دیکھ کر یہ معجزہ شاہ امم
روزِ جزا، قہرِ خدا سے غمزدہ ہونگے سبھی
رکھنا بھرم اس دن مرا بہر خدا شاہ امم
دل میں یہی ہے آرزو کہ *انتخاب** *اب روبرو
دیکھے کبھی آکر ترا گنبد ہرا شاہ امم
انتخاب واحدی

تو ہی تو ہے بحر سخا، کان عطا، شاہ امم
تیرا کرم، حد سے سوا، حد سے سوا ،شاہ امم
سیرت تری، صورت تری، جلوہ ترا ،تلوہ ترا
تیری عطا ،تیری ادا، سب سے جدا، شاہ امم
توصیف شاہ کن فکاں، بر ہر زبان عاشقاں
“راحت رساں ،آرام جاں ،تیری ثنا شاہ امم”
پھر کیسا غم، کیسا الم ،جب تیری ہے چشم کرم
محشر میں بھی رکھنا بھرم، بہر خدا شاہ امم
محبوب رب پیدا ہوا، تو مجرے کو کعبہ جھکا
ہر لب پہ جاری ہوگیا، صد مرحبا شاہ امم
ہجرت کی شب، کفار سب ،ڈوبے ہیں در غیظ و غضب
کاشانے سے نکلے ہیں جب، نور خدا شاہ امم
مرقد کی وہ تیرہ شبی، منظر ڈراۓ کیا کبھی
آئیں گے آئیں گے ابھی بن کر ضیا، شاہ امم
سید منظر حسین قادری مصباحی بانی و سربراہ اعلیٰ مرکز العلوم انواررضا سہسرام و کلیۃالبنات انوارالفاطمہ تیلوتھو رہتاس بہار

تیرا کرم شاہِ امم ، تیری عطا شاہِ امم
سب سےحسیں سب سےالگ سب سےجُداشاہِ امم
تجھ پر فدا، دل جان سے شاہ و گدا شاہِ امم
راحت رساں ،آرامِ جاں ،تیری ثنا ، شاہِ امم
تیرا کہا ، وحئِ خدا ، کرتا ہے رب تیری ثنا
رب کی قسم تیری رٙضا،رٙب کی رٙضا،شاہِ امم
امت کے حالِ زار پر ، ہو جائے رحمت کی نظر
مولائےکُل، ختم الرسل ، یا مصطفٰے ، شاہِ امم
شمس و قمر مانیں کہا ، کنکر پڑھیں کلمہ ترا
مولا سے یہ رتبہ فقط تجھ کو ملا شاہِ امم
اتنی سی ہے بس التجا اے سرور ارض و سما
دیکھے گدا روضہ ترا قبلِ قضا شاہِ امم
تعریف کیا عنبر کرے شہرِ مقدس کی ترے
رشکِ اِرم طیبہ کے ہیں صبح و مٙسا شاہِ امم
“”””””””محمد جسیم الدین خان عنبر””””””””””

شاہ عرب شاہ زماں۔۔۔۔ شاہ دنی شاہ امم
ہر اک لقب زیبا تجھے یا مصطفی شاہ امم
وجہ اماں وجہ سکوں وجہ رضاۓ کبریا
راحت رساں آرام جاں تیری ثنا شاہ امم
تیرا کرم میرا بھرم تیری عطا میری بقا
تیری ثنا ورد زباں صبح و مسا شاہ امم
روح الامیں بھی تھم گۓ سدرہ سے آگے تم گۓ
ہرگام پر بڑھتارہا قرب خدا۔۔۔۔۔۔۔۔ شاہ امم
کونین کے مالک ہو تم مخلوق کے حاکم ہو تم
جس کو ملا جو بھی ملا تم سے ملا شاہ امم
ہم نے اگر چرچا کیا نجدی ہے کیوں حیرت زدہ
نبیوں نے بھی چرچا کیا۔۔۔۔۔ ہے آپ کا شاہ امم
مدت سے یہ ارمان ہے شہر شفا میں دیکھ لوں
تنویر کو بلوایۓ …………..طیبہ ذرا شاہ امم
از۔۔۔۔۔۔۔تنویر خالد رضوی بنگلور

بے چاروں کے اے چارہ گر اے حق نما شاہ امم
چشمِ کرم فرمائیے بر حالِ ما شاہ امم
تیری صدا تیری ادا سب سے الگ سب سے جدا
راحت رساں؛ آرامِ جاں؛ تیری ثنا! شاہ امم
نقش کفِ پا ہے ترا؛ بخشش کی رہ؛ راہِ خدا
دیدارِ خالق کا سبب جلوہ ترا شاہ امم
شمس وقمر؛ سنگ وشجر؛ برگ وثمر؛ ذرہ؛ گہر
گاتے ہیں سب جن و بشر نغمہ ترا شاہ امم
یٰسین و مزمّل ہے تو قرآن کا حاصل ہے تو
تیرے ذریعے سے ملا ہم کو خدا شاہ امم
وجہِ بِنائے کائنات بے شک بنی تیری ہی ذات
اے دافعِ لات و منات شمعِ ھدٰی شاہ امم
شیدا کی فرقت کو مٹا بہرِ خدا پردہ ہٹا
دیدار کا شربت پلا؛ چہرہ دکھا شاہ امم
از قلم:
محمد حمزہ شیدا قادری اسمٰعیلی رضوی بنارسی

یا مصطفٰی یا مجتبٰی صلّ علٰی شاہ امم
رتبہ ترا سب سے بڑا بعد خدا شاہ امم
کیسے کہوں اپنی طرح تجھ کو بھلا شاہ امم
میں خاک تو ہے نور خدا بدرالدجٰی شاہ امم
تو ہی ہے وجہ ”کن فکاں“ تو واقف سرّ نہاں
” راحت رساں، آرام جاں،تیری ثنا شاہ امم“
امّی لقب ماہ عرب ختم الرسل مولاٸے کل
سارا جہاں تجھ پر فدا خیرالورٰی شاہ امم
مانا کہ پل ہے پر خطرپھربھی نہیں ہےکوٸی ڈر
جب آپ ہیں محو دعا ٕ نور خدا شاہ امم
بولےیہ سدرہ کےمکیں کوٸی نہیں تجھ ساحسیں
بے مثل ہے چہرہ ترا نورالھدٰی شاہ امم
سن اے رفیق غمزدہ محشرکا تجھ کو خوف کیا
ہیں شافع روز جزا ٕ جب مصطفٰی شاہ امم
از ✍ رفیق احمدنوری مصباحی

ماہ زمیں، مہر زماں، شمع دنیٰ شاہ امم
حور و ملک، جن و بشر تم پر فدا شاہ امم
فضل و کرم، رحم و عطا کے گل کھلا شاہ امم
شاخ الم کر دے قلم بہر خدا شاہ امم
نقش قدم خضر ظُلَمْ، شمع حرم، ماہ ارم
داروئے غم خاک قدم کردے عطا شاہ امم
یادیں تری ہیں گل فشاں، محفل تری رشک جناں
راحت رساں، آرام جاں، تیری ثنا شاہ امم
شمس و قمر رخ کی ضیا بزم جہاں صدقہ ترا
شاہ و گدا سب کا بھلا تجھ سے ہوا شاہ امم
بخشش کی نکلے کوئی سبیل اے مظہر نعم الوکیل
در پر ترے عاجز خلیل کی ہے دعا شاہ امم
خلیل الله نظامی مصباحی

یا رحمت للعالمیں نور خدا, شاہ امم
راحت رساں آرام جاں تیری ثنا شاہ امم
ہو آرزوپوری شہا, وقت آخری جب ہو مرا
سر ہو مرا در ہو ترا آئے قضا شاہ امم
پھیلائے دامن آگیا، میں آپ کے دربار میں
بھر دیجئے بہر خدا یامصطفی شاہ امم
عرش بریں زیر قدم، منزل تری ہے لامکاں
حیرت میں ہے فکر رسا، لکھے تو کیا شاہ امم
روشن جو تارے ہیں سبھی تیری ہی ہے سب روشنی
کھاتے ہیں سب جن و بشر صدقہ ترا شاہ امم
محشر میں سارے انبیاء چاہیں گے اللہ کی رضا
لیکن وہاں وہ چاہے گا تیری رضا شاہ امم
لکھتا ہے عاصم نعت بس تیری اسی امید پر
کام آئے گی مدحت تری روز جزا, شاہ امم
از
صدام حسین عاصم چشتی

یہ وہ 19 کلام تھے جو مقابلہ میں شامل ہوۓ..
اس مرتبہ بھی بزم نعت گروپ کے مقابلہ میں ججوں کے پینل نے سارے کلاموں کو نمبرات سے نوازا…
اس کےنتائج آپ کے سامنے پیش ہیں….
پہلے آپ ہمارے فیصل پینل سے ملاقات کر لیں..
جج پینل میں 4 معزز لوگ شامل ہیں
…جج پینل….
1 استاذالشعراحضرت علامہ الحاج الشاہ مفتی صغیر اختر مصباحی صاحب قبلہ ، بریلی شریف.
2 استاذالشعرا حضرت علامہ سراج تابانی صاحب قبلہ ، کلکتہ
3 حضرت علامہ طفیل علوی صاحب قبلہ جھارکھنڈ.
4 رئیس القلم شاعر ذی وقار حضرت علامہ الشاہ مفتی احسن کمال رضوی صاحب قبلہ ، بنارس.
بزم نعت کے مقابلہ میں شرکت کے لئے آنے والے کلاموں کو چار الگ الگ زاویوں سے جانچا پرکھا جاتا ہے
1- حسنِ فن
2- حسنِ مضمون
3- حسنِ زبان
4- حسنِ بیان
مذکورہ عناوین کو مد نظر رکھتے ہوئے جج حضرات کا پینل فیصلہ سناتا ہے
1- حسنِ فن یعنی کلام کی فنی اور عروضی نزاکتوں، خوبیوں اور خامیوں کو دیکھتے ہوئے حضرت علامہ مفتی صغیر اختر مصباحی صاحب قبلہ کلام کو نمبرات عنایت فرماتے ہیں.
2- حسنِ مضمون یعنی کلام میں مستعمل مضامین کس معیار کے ہیں اس کو نظر میں رکھتے ہوئے استاذالشعرا حضرت علامہ سراج تابانی صاحب قبلہ کلام کو نمبرات عنایت فرماتے ہیں.
3- حسنِ زبان یعنی کلام میں استعمال کی گئی زبان کے معیار کو دیکھتے ہوئے حضرت علامہ الشاہ طفیل علوی صاحب قبلہ کلام کو نمبرات عنایت فرماتے ہیں.
4- حسنِ بیان یعنی معنی کی ادائیگی اور معیار کو دیکھتے ہوئے حضرت علامہ الشاہ مفتی احسن کمال رضوی صاحب قبلہ کلام کو نمبرات عنایت فرماتے ہیں.
الحمد لللہ ہمارے پینل نے پوری مستعدی اور ذمہ داری سے اپنے فرائض کو انجام دیا…..
08-10-2018
عالمی واٹسپ گروپ بزم نعت کے فائنل نتائج…..
سرپرستِ “بزم نعت” حضور سید حسان میاں صاحب قبلہ کے حکم پرمنعقد ہوۓ “بزم نعت” کے ترسٹھویں طرحی مشاعرہ میں جج پینل کے ذریعہ دئے گئے نمبرات کی تفصیل پیش ہے…
ہمارے پینل میں 4 جج حضرات ہیں جو مختلف عناوین کے تحت ہر کلام کو نمبرات عنایت فرماتے ہیں
ہر عنوان پر زیادہ سے زیادہ 25 نمبر تک مل سکتے ہیں یعنی ایک شاعر کو زیادہ سے زیادہ 100 نمبر تک حاصل ہو سکتے ہیں.
سبھی جج حضرات کے انفرادی نتیجے آپ دیکھ چکے ہیں…
اب مجموعی تفصیل ملاحظہ فرمائیں.
نام شاعر کل نمبر
1 جناب اختر حشمتی 83
2 ڈاکٹر سرور قادری 81
3 جناب نورالہدیٰ 81
4 جناب افضل قادری 79
5 جناب کفیل فتح پوری 77
6 جناب عنبر رانچوی 76
7 ڈاکٹر کاشف بریلوی 75
8 سید منظر قادری 75
9 جناب تنویر خالد 74
10 جناب علی احمد رضوی 73
11 جناب مسعود درد 72
12 جناب عاصم چشتی 71
13 جناب نعیم برکاتی 70
14 جناب شیدا اسماعیلی 69
15 جناب ریاض شمسی 68
16 جناب انتخاب واحدی 67
17 جناب ظفر انور حمیدی 66
18 جناب رفیق نوری 66
19 جناب خلیل اللّه نظامی 66
اس طرح اس مقابلہ میں حضرت علامہ اختر حشمتی صاحب قبلہ نے 83 نمبر کے ساتھ پہلا ، حضرت ڈاکٹر سرور قادری صاحب قبلہ نے 81 نمبر کے ساتھ دوسرا اور حضرت مولانا نورالہدیٰ صاحب قبلہ نے 81 نمبر پا کر تیسرا مقام حاصل کیا.
میں تمام اراکین کی جانب سے ان تینوں عظیم شعرا کو دلی مبارکباد پیش کرتا ہوں…..
ان شاء اللّه بہت جلد سرپرستِ “بزم نعت”حضور سید حسان میاں صاحب قبلہ کی جانب سے خانقاہ مسولی شریف کے تحائف تینوں حضرات کو ارسال کر دئے جائیں گے….

Naat Sharif

Share this:

Like this: