Koyi Kya Jane Jo Tum Ho Khuda Hi Jaane Kya Tum Ho
Khuda To Keh Nahi Sakte Magar Shaane Khuda Tum Ho
Nabiyoun Me Ho Tum Aise Nabiyul Ambiya Tum Ho
Haseenoun Me Tum Aise Ho Ke Mehboob E Khuda Tum Ho
Tumhara Husn Aisa Hai Ki Mehboob E Khuda Tum Ho
Mahe Kaamil Kare Kasbe Ziya Wo Mahlika Tum Ho
Uluwe Martabat Pyaare Tumhara Sab Pe Raushan Hai
Makeen E La Makaan Tum Ho Shah E Arshe Ula Tum Ho
Tumhari Hamd Farmaee Khuda Ne Apne Quran Me
Muhammad Aur Mumajjad Mustafa O Mujtaba Tum Ho
Jo Sab Se Pichla Hoga Uska Pichla Ho Nahi Sakta
Ki Wo Pichla Nahi Agla Hua Usse Wara Tum Ho
Tumhi Se Fatha Farmaee Tumhi Par Qatm Farmaee
Rasool Ki Ibteda Tum Ho Nabi Ki Intehaa Tum Ho
Khuda Ne Zaat Ka Apni Tumhe Mazhar Banaya Hai
Jo Haq Ko Dekna Chahe To Uske Aaina Tum Ho
Tumhi Batin Tumhi Zahir Tumhi Awwal Tumhi Aaqir
Niha Bhi Ho Ayaa Bhi Mubtada O Muntaha Tum Ho
Munawwar Kar Diya Hai Aap Ke Jalwo Ne Aalam Ko
Maho Khursheed Ko Baqshi Ziya Noor E Quda Tum Ho
Mita Di Kufr Ki Zulmat Tumhare Roo E Raushan Ne
Sawera Shirk Ka Tumne Kiya Shams O Duha Tum Ho
Jahan Taarik Tha Saara Andhera Hi Andhera Tha
Tum Aaye Zulmate Tumse Miti Badrudduja Tum Ho
Mera Mu Kya Ke Mai Madh O Sataish Me Zuba Kholoon
Mere Aqa Tum Aise Ke Mumdoohe Khuda Tum Ho
Rafa’na Se Tumhari Rifat E Baala Huwi Zahir
Ke Mehboob Bane Rab Me Sab Se Aali Martaba Tum Ho
Uloowe Rutba E Sarkaar E Aali Sab Pe Raushan Hai
Makeen E La Makaan Tum Ho Shahe Arshe Ula Tum Ho
Shabe Mearaj Se Ay Sayyide Kul Ho Gaya Zaahir
Rasool Hai Muqtadi Saare Imam Ul Ambiya Tum Ho
Na Hote Tum Na Hote Wo Ke Asle Jumla Tum Hi Ho
Qabar The Wo Tumhari Mere Maula Mubtada Tum Ho
Tumhare Chahne Wale Ko Kuch Aisi Mohabbat Hai
Udhar Ho Jae Wo Maula Jidhar Sadrul Wara Tum Ho
Tumhare Chahne Wale Use Mehboob Hai Saare
Kuch Is Andaaz Ke Pyaare Habeeb E Kibriya Tum Ho
Tumhare Baad Paida Ho Nabi Koyi Nahi Mumkin
Nubuvvat Khatam Hai Tum Par Ki Khatmul Ambiya Tum Ho
Ye Kya Maine Kiya Kyu Dhoond Dala Arsa E Mehshar
Hame Maloom Tha Pyaare Hamara Mud Da’aa Tum Ho
Magar Aisa Na Kyu Hota Ke Mehshar Me Ye Khulna Tha
Shafi E Mujrima Peshe Khuda Tanha Shaha Tum Ho
Giraftaar E Balaa Hazir Hue Hai Toote Dil Le Kar
Ki Har Bekal Ki Kal Toote Dilo Ka Aasra Tum Ho
Khabar Lije Khudara Mere Maula Mujh Se Bekas Ki
Ki Har Bekas Ke Kas Bebas Ke Bas Roohi Fida Tum Ho
Musallat Kardiya Tumko Khuda Ne Apne Ghaibo Par
Nabi E Mujtaba Tum Ho Rasool E Murtuza Tum Ho
Chamak Jaaye Dile Noori Tumhare Paak Jalwo Se
Mita Do Zulmat E Dil Ki Mere Noor Ul Huda Tum Ho